圖1,2係底色, 3係最後既紅色。呢隻紅應該用灰底都OK, 不過廢事閃燈之類情況下會出現古怪, 所以都係打底色先。順便試下邊D位難上色, 因為D珠好多係夾o係隙位入面, 用0.3噴左D邊位先用290大炮去噴, 尤其額頭Fatima坐艙要好順。今日濕度低, 之前用匙試色時呢隻紅比較啞色, 所以用Leveling thinner噴。閃燈見到左胸粒lin未噴好, 下轉噴紅色再補補。仲有背後有兩粒紅色, 因為背脊兩塊甲上高又係紅色, 四粒紅色的話太多重複, 就只噴甲上兩粒, 好似LED Mirage背後咁, 有三個十字堆埋一齊。
膊頭想噴左裡面三條先, 所以之前噴紅色冇噴到。
星期一噴左D關節, 噴左幾件睇下D色, 唔對路所以停左手。[左]拼埋去啡色既甲底,見到好多青色tone, 而且好似太淺色, 想像腳掌同頭角兩支唔會好睇。[右]尋晚加深左, 將佢拉去近紫色tone少少。
手腕兩part廢件試色。頂果支匙係甲底色, 中間係外甲主色, 最底橙色間住係新關節色(隔離就係舊色)
手爭D ball joint噴關節色, 呢D位扮重戰機算~
每人都有自己的Masking技
我呢就多數都係介一條0.3-5左右既長條, cut成圓周長度圍上去, 最好係一條過唔駁, 同時唔好overlap太多, 再貼其他大範圍mask(膠紙,摭蓋液), 圓位黎講如果有CPL賣果塊cut圓形野就唔駛咁做, 不過呢個做法又可以mask不規側形狀。
上底色同覆蓋紅色, 因為要噴隙位暗角位,所以唔理texture, 上左色先再2000磨, 今日晏D先再噴完成埋
拆膠紙咁過癮, 唔記得拍片。
紅色有D厚, 拆膠紙有條邊, 早知應該噴左紅色先。
今朝早開始噴,唔靚, 等乾磨左再噴, 中塵, 又有D位冇咁順, 又等乾又磨再噴。最後諗住去到呢個程度可以接受, 又冇塵, 點知拆膠紙之後見到右邊前面有兩條好細既花痕,約1mm長 :( 將件野打平向天先會見到, 入袋為安鳩算撚就。如果之後噴黑色再有D咩甩漏先至重做
甩油喎, 額頭之前劃眼影相見到有D崩邊,補過磨過,摭住cockpit噴返D灰, 撕膠紙時扯甩紅色一角, 梗係之前洗得唔足。再磨左噴返紅色, 影相睇下有冇色差。好在唔係噴晒黑色先黎甩, 用膠紙周圍黐下睇下仲有冇甩
準備噴紫色
橙色再改淺少少(中間一段)
盾三粒玉預左唔順, 一陣磨, 洗水 聽日再噴
甩油記事, 省得唔到果D位都甩。
及早發現冇乜影響, 反正甲底色改左要再噴, 呢張相都見兩個tone
橙前剷後
剷前明顯橙皮紋
剷後
再噴, macro下既表面
一般距離睇, 呢三粒上左色之後好鬼有深度
劍柄橙色紫色完成, 另一邊未拆膠紙因為要mask手掌
滑滑
mask左噴手掌
噴橙色紫色一層層疊埋 唔滑
影完相下次再補噴
一拳
[跳橋] 黑色噴左上裙甲之後, 發現紫色太含畜
因為WSC黑騎好多內彎曲面同平面, 唔似上次Gastness全身都係凸曲面, 變左只加少少紫色去吊味唔work, 除左盾同腳凸曲面見到紫色之外, 裙甲膊頭完全只有深灰色。所以又要再溝過主色。圖中見到有兩隻
摭膠紙
圖解, 黃色係膠紙, 綠色係摭蓋液
用0.3噴左D隙位先
有D灰色重新噴過去修正返tone偏差
盾底係Mask左6,7層灰色, 只在中間個環上少少金屬色
最多功夫果度, 整完黑色再到紅色, 之後unmask先知有冇炒粉重做
噴左第一浸黑色
磨左#2000, 發現有D邊位收縮, 有必要磨穿底灰重做
尤其甲既側邊位
最後都係要出動#1500
上次提過, 凹凸曲面加埋環境令到張相顏色唔同, 我將右腳part向一個方向, 右腳會係紫色, 左腳part向另一方向就出左藍藍綠綠, 而我係著住綠色T-Shirt
噴完黑色, D油剩返樽底少少,如果之後再有咩意外要重做, 唔夠油既話要溶返之前試色果支匙更 XD
摭腳腕上20粒Magatama, 用慢乾果隻
影macro睇下係咪封好
Unmask, 睇圖好似漏油,其實係摭蓋液條邊薄, 仲有少少留o係邊上, 要用鉗慢慢剔返出來
之後到個盾上12條紅色, 希望一樣咁順利
[ 本帖最後由 大佬John 於 2017-4-1 07:15 PM 編輯 ]
No comments:
Post a Comment